సఫారీ vs అఫ్ఘాన్: ప్రపంచ కప్ 2023(World Cup 2023)లో భాగంగా.. ఆఫ్ఘనిస్తాన్ పై దక్షిణాఫ్రికా 5 వికెట్ల తేడాతో విజయం సాధించింది. 245 పరుగుల లక్ష్యంతో బరిలోకి దిగిన సౌతాఫ్రికా 47.3 ఓవర్లలో 5 వికెట్లు కోల్పోయి టార్గెట్ ను ఛేదించింది. దీంతో వరల్డ్ కప్ నుంచి ఆఫ్ఘానిస్తాన్ నిష్క్రమించింది. అహ్మదాబాద్లోని నరేంద్ర మోదీ స్టేడియంలో జరిగిన ఈ మ్యాచ్లో టాస్ ఓడి తొలుత బ్యాటింగ్ చేసిన ఆఫ్ఘనిస్థాన్ 50 ఓవర్లలో 244 పరుగులకు ఆలౌటైంది. ఆఫ్ఘాన్ జట్టులో అజ్మతుల్లా ఉర్జాయ్ 97 పరుగులతో అద్భుతమైన ఇన్నింగ్స్ ఆడాడు. ఇక దక్షిణాఫ్రికా తరపున గెరాల్డ్ కోయెట్టీ 4 వికెట్లు తీశాడు.
245 పరుగుల లక్ష్యంతో బరిలోకి దిగిన దక్షిణాఫ్రికా.. క్వింటన్ డి కాక్ (41), కెప్టెన్ టెంబా బావుమా(23) తొలి వికెట్ కు 64 పరుగుల భాగస్వామ్యం నెలకొల్పారు. ఆ తర్వాత రాస్సీ వాన్ డెర్ డస్సెన్ (76), మార్క్రామ్(25) పరుగులు చేశారు. వీరిద్దరి మధ్య 50 పరుగుల భాగస్వామ్యాన్ని నెలకొల్పారు. ఆ తర్వాత బ్యాటింగ్కు వచ్చిన హెన్రిచ్ క్లాసెన్ (10) పరుగులు చేసి ఔటయ్యాడు. డేవిడ్ మిల్లర్ (24), ఆండిలే ఫెహ్లుక్వాయో (39) పరుగులు చేశారు. ఇక ఈ మ్యాచ్ లో వాన్ డెర్ డ్యూసెన్ క్రీజులో నిలిచి జట్టును గెలిపించడంలో కీలకపాత్ర పోషించాడు. ఇక ఆఫ్ఘానిస్థాన్లో బౌలింగ్ లో మహ్మద్ నబీ, రషీద్ ఖాన్ తలో రెండు వికెట్లు తీశారు. ముజీబ్ ఉర్ రెహ్మాన్ కు ఒక వికెట్ దక్కింది.
